אין המלך נושע ברב חיל גבור לא ינצל ברב כח׃

ויהי אחר הדברים האלה והאלהים נסה את אברהם ויאמר אליו אברהם ויאמר הנני׃

ויאמר יהוה אל שמואל אל תבט אל מראהו ואל גבה קומתו כי מאסתיהו כי לא אשר יראה האדם כי האדם יראה לעינים ויהוה יראה ללבב׃

כי ידע דרך עמדי בחנני כזהב אצא׃

יגמר נא רע רשעים ותכונן צדיק ובחן לבות וכליות אלהים צדיק׃

כי בחנתנו אלהים צרפתנו כצרף כסף׃

בחון נתתיך בעמי מבצר ותדע ובחנת את דרכם׃

נחר מפח מאשתם עפרת לשוא צרף צרוף ורעים לא נתקו׃

ומי מכלכל את יום בואו ומי העמד בהראותו כי הוא כאש מצרף וכברית מכבסים׃

וישב מצרף ומטהר כסף וטהר את בני לוי וזקק אתם כזהב וככסף והיו ליהוה מגישי מנחה בצדקה׃