מי כמכה באלם יהוה מי כמכה נאדר בקדש נורא תהלת עשה פלא׃

אין כמוך באלהים אדני ואין כמעשיך׃

ואל מי תדמיון אל ומה דמות תערכו לו׃

ואל מי תדמיוני ואשוה יאמר קדוש׃

אנכי אנכי יהוה ואין מבלעדי מושיע׃

גם מיום אני הוא ואין מידי מציל אפעל ומי ישיבנה׃

מי שמע כזאת מי ראה כאלה היוחל ארץ ביום אחד אם יולד גוי פעם אחת כי חלה גם ילדה ציון את בניה׃

מאין כמוך יהוה גדול אתה וגדול שמך בגבורה׃

וישמן ישרון ויבעט שמנת עבית כשית ויטש אלוה עשהו וינבל צור ישעתו׃

וירכב על כרוב ויעף וידא על כנפי רוח׃

שירו לאלהים זמרו שמו סלו לרכב בערבות ביה שמו ועלזו לפניו׃

לרכב בשמי שמי קדם הן יתן בקולו קול עז׃

תנו עז לאלהים על ישראל גאותו ועזו בשחקים׃

המקרה במים עליותיו השם עבים רכובו המהלך על כנפי רוח׃

משא מצרים הנה יהוה רכב על עב קל ובא מצרים ונעו אלילי מצרים מפניו ולבב מצרים ימס בקרבו׃

הבנהרים חרה יהוה אם בנהרים אפך אם בים עברתך כי תרכב על סוסיך מרכבתיך ישועה׃