ויאמר אלהים יהי מארת ברקיע השמים להבדיל בין היום ובין הלילה והיו לאתת ולמועדים ולימים ושנים׃

ופן תשא עיניך השמימה וראית את השמש ואת הירח ואת הכוכבים כל צבא השמים ונדחת והשתחוית להם ועבדתם אשר חלק יהוה אלהיך אתם לכל העמים תחת כל השמים׃

אם אראה אור כי יהל וירח יקר הלך׃

כי אראה שמיך מעשי אצבעתיך ירח וכוכבים אשר כוננתה׃

בכל הארץ יצא קום ובקצה תבל מליהם לשמש שם אהל בהם׃

מקצה השמים מוצאו ותקופתו על קצותם ואין נסתר מחמתו׃

הללוהו שמש וירח הללוהו כל כוכבי אור׃

יהללו את שם יהוה כי הוא צוה ונבראו׃

וחפרה הלבנה ובושה החמה כי מלך יהוה צבאות בהר ציון ובירושלם ונגד זקניו כבוד׃