כי כלכם אשר נטבלתם למשיח לבשתם את המשיח׃

ותלבשו את האדם החדש הנברא כדמות אלהים בצדקה וקדשת האמת׃

ולבשתם את האדם החדש המתחדש בדעת כצלם בראו׃

לכן אתם כבחירי האלהים הקדשים והחביבים לבשו המון רחמים ונדיבות ונמיכות רוח וענוה וארך אפים׃

לכן אחי חיבים אנחנו לא לבשר לחיות לפי הבשר׃

כי אם תחיו לפי הבשר מות תמתון ואם על ידי הרוח תמותתו את מעללי הבשר חיה תחיו׃

והנני אמר התהלכו ברוח ולא תמלאו את תאות הבשר׃

כי הבשר מתאוה הפך מן הרוח והרוח הפך מן הבשר ושניהם מתקוממים זה לזה עד שלא תוכלו לעשות את אשר תחפצו׃

ואשר הם למשיח צלבו את בשרם עם כל תשוקתיו ותאותיו׃

על כן תמותתו את אבריכם בארץ את הזנות והטמאה והזמה והתאות הרעות ונטות אחרי הבצע אשר היא עבודת אלילים׃

אשר גם אתם הלכתם בהם מלפנים בחיותכם בתוכם׃

אהובים אזהירכם כגרים ותושבים הנזרו מתאות הבשר המתגרות בנפש׃

אל תאהבו את החלד ואת דברי החלד אם יאהב איש את החלד אין בו אהבת האב׃

והחלד עבור יעבר עם תאותיו והעשה רצון אלהים יעמד לעד׃