למען ידרשו שארית אדם את יהוה וכל הגוים אשר נקרא שמי עליהם נאם יהוה עשה כל אלה׃

למנצח מזמור לדוד השמים מספרים כבוד אל ומעשה ידיו מגיד הרקיע׃

אין אמר ואין דברים בלי נשמע קולם׃

והוא כחתן יצא מחפתו ישיש כגבור לרוץ ארח׃

כי מהותו הנעלמה היא כחו הנצחי ואלהותו מעת נברא העולם תודע במעשים ותראה לבלתי היות להם להתנצל׃

או התבוז לעתרת טובו ולחמלתו ולארך רוחו ולא תתבונן כי טובת האלהים תדריך אתך לתשובה׃

וגם לא חדל להעיד על עצמו וייטב לנו בתתו מטר מן השמים ועתות שבע וימלא לבותינו מזון וששון׃

כי האמנם ישב אלהים על הארץ הנה השמים ושמי השמים לא יכלכלוך אף כי הבית הזה אשר בניתי׃

למנצח לדוד מזמור יהוה חקרתני ותדע׃

ארחי ורבעי זרית וכל דרכי הסכנתה׃

אחור וקדם צרתני ותשת עלי כפכה׃

אנה אלך מרוחך ואנה מפניך אברח׃

אשא כנפי שחר אשכנה באחרית ים׃

ואמר אך חשך ישופני ולילה אור בעדני׃

כי אתה קנית כליתי תסכני בבטן אמי׃

האלהי מקרב אני נאם יהוה ולא אלהי מרחק׃

אם יסתר איש במסתרים ואני לא אראנו נאם יהוה הלוא את השמים ואת הארץ אני מלא נאם יהוה׃