2
נקם נקמת בני ישראל מאת המדינים אחר תאסף אל עמיך׃
3
וידבר משה אל העם לאמר החלצו מאתכם אנשים לצבא ויהיו על מדין לתת נקמת יהוה במדין׃
4
אלף למטה אלף למטה לכל מטות ישראל תשלחו לצבא׃
5
וימסרו מאלפי ישראל אלף למטה שנים עשר אלף חלוצי צבא׃
6
וישלח אתם משה אלף למטה לצבא אתם ואת פינחס בן אלעזר הכהן לצבא וכלי הקדש וחצצרות התרועה בידו׃
7
ויצבאו על מדין כאשר צוה יהוה את משה ויהרגו כל זכר׃
8
ואת מלכי מדין הרגו על חלליהם את אוי ואת רקם ואת צור ואת חור ואת רבע חמשת מלכי מדין ואת בלעם בן בעור הרגו בחרב׃
9
וישבו בני ישראל את נשי מדין ואת טפם ואת כל בהמתם ואת כל מקנהם ואת כל חילם בזזו׃
10
ואת כל עריהם במושבתם ואת כל טירתם שרפו באש׃
11
ויקחו את כל השלל ואת כל המלקוח באדם ובבהמה׃
12
ויבאו אל משה ואל אלעזר הכהן ואל עדת בני ישראל את השבי ואת המלקוח ואת השלל אל המחנה אל ערבת מואב אשר על ירדן ירחו׃