Lévitique 15:1-18
1
וידבר יהוה אל משה ואל אהרן לאמר׃
2
דברו אל בני ישראל ואמרתם אלהם איש איש כי יהיה זב מבשרו זובו טמא הוא׃
3
וזאת תהיה טמאתו בזובו רר בשרו את זובו או החתים בשרו מזובו טמאתו הוא׃
4
כל המשכב אשר ישכב עליו הזב יטמא וכל הכלי אשר ישב עליו יטמא׃
5
ואיש אשר יגע במשכבו יכבס בגדיו ורחץ במים וטמא עד הערב׃
6
והישב על הכלי אשר ישב עליו הזב יכבס בגדיו ורחץ במים וטמא עד הערב׃
7
והנגע בבשר הזב יכבס בגדיו ורחץ במים וטמא עד הערב׃
8
וכי ירק הזב בטהור וכבס בגדיו ורחץ במים וטמא עד הערב׃
9
וכל המרכב אשר ירכב עליו הזב יטמא׃
10
וכל הנגע בכל אשר יהיה תחתיו יטמא עד הערב והנושא אותם יכבס בגדיו ורחץ במים וטמא עד הערב׃
11
וכל אשר יגע בו הזב וידיו לא שטף במים וכבס בגדיו ורחץ במים וטמא עד הערב׃
12
וכלי חרש אשר יגע בו הזב ישבר וכל כלי עץ ישטף במים׃
13
וכי יטהר הזב מזובו וספר לו שבעת ימים לטהרתו וכבס בגדיו ורחץ בשרו במים חיים וטהר׃
14
וביום השמיני יקח לו שתי תרים או שני בני יונה ובא לפני יהוה אל פתח אהל מועד ונתנם אל הכהן׃
15
ועשה אתם הכהן אחד חטאת והאחד עלה וכפר עליו הכהן לפני יהוה מזובו׃
16
ואיש כי תצא ממנו שכבת זרע ורחץ במים את כל בשרו וטמא עד הערב׃
17
וכל בגד וכל עור אשר יהיה עליו שכבת זרע וכבס במים וטמא עד הערב׃
18
ואשה אשר ישכב איש אתה שכבת זרע ורחצו במים וטמאו עד הערב׃
Lévitique 11:46
זאת תורת הבהמה והעוף וכל נפש החיה הרמשת במים ולכל נפש השרצת על הארץ׃
Lévitique 13:59
זאת תורת נגע צרעת בגד הצמר או הפשתים או השתי או הערב או כל כלי עור לטהרו או לטמאו׃
Lévitique 14:2
זאת תהיה תורת המצרע ביום טהרתו והובא אל הכהן׃
Lévitique 14:32
זאת תורת אשר בו נגע צרעת אשר לא תשיג ידו בטהרתו׃
Lévitique 14:54-57
54
זאת התורה לכל נגע הצרעת ולנתק׃
55
ולצרעת הבגד ולבית׃
56
ולשאת ולספחת ולבהרת׃
57
להורת ביום הטמא וביום הטהר זאת תורת הצרעת׃
Nombres 5:29
זאת תורת הקנאת אשר תשטה אשה תחת אישה ונטמאה׃
Nombres 6:13
וזאת תורת הנזיר ביום מלאת ימי נזרו יביא אתו אל פתח אהל מועד׃
Nombres 19:14
זאת התורה אדם כי ימות באהל כל הבא אל האהל וכל אשר באהל יטמא שבעת ימים׃
Ezechiel 43:12
זאת תורת הבית על ראש ההר כל גבלו סביב סביב קדש קדשים הנה זאת תורת הבית׃