בשלחי את חצי הרעב הרעים בהם אשר היו למשחית אשר אשלח אותם לשחתכם ורעב אסף עליכם ושברתי לכם מטה לחם׃

בן אדם ארץ כי תחטא לי למעל מעל ונטיתי ידי עליה ושברתי לה מטה לחם והשלחתי בה רעב והכרתי ממנה אדם ובהמה׃

בשברי לכם מטה לחם ואפו עשר נשים לחמכם בתנור אחד והשיבו לחמכם במשקל ואכלתם ולא תשבעו׃

ויקרא רעב על הארץ כל מטה לחם שבר׃

כי הנה האדון יהוה צבאות מסיר מירושלם ומיהודה משען ומשענה כל משען לחם וכל משען מים׃

ומאכלך אשר תאכלנו במשקול עשרים שקל ליום מעת עד עת תאכלנו׃

ומים במשורה תשתה ששית ההין מעת עד עת תשתה׃

בן אדם לחמך ברעש תאכל ומימיך ברגזה ובדאגה תשתה׃

ואמרת אל עם הארץ כה אמר אדני יהוה ליושבי ירושלם אל אדמת ישראל לחמם בדאגה יאכלו ומימיהם בשממון ישתו למען תשם ארצה ממלאה מחמס כל הישבים בה׃

הראיתה עמך קשה השקיתנו יין תרעלה׃

כל עמה נאנחים מבקשים לחם נתנו מחמודיהם באכל להשיב נפש ראה יהוה והביטה כי הייתי זוללה׃

טובים היו חללי חרב מחללי רעב שהם יזובו מדקרים מתנובת שדי׃

ידי נשים רחמניות בשלו ילדיהן היו לברות למו בשבר בת עמי׃

בנפשנו נביא לחמנו מפני חרב המדבר׃