מדן נשמע נחרת סוסיו מקול מצהלות אביריו רעשה כל הארץ ויבואו ויאכלו ארץ ומלואה עיר וישבי בה׃

עלו הסוסים והתהללו הרכב ויצאו הגבורים כוש ופוט תפשי מגן ולודים תפשי דרכי קשת׃

אז הלמו עקבי סוס מדהרות דהרות אביריו׃

התתן לסוס גבורה התלביש צוארו רעמה׃

יחפרו בעמק וישיש בכח יצא לקראת נשק׃

עליו תרנה אשפה להב חנית וכידון׃

בדי שפר יאמר האח ומרחוק יריח מלחמה רעם שרים ותרועה׃

משפעת סוסיו יכסך אבקם מקול פרש וגלגל ורכב תרעשנה חומותיך בבאו בשעריך כמבואי עיר מבקעה׃

בפרסות סוסיו ירמס את כל חוצותיך עמך בחרב יהרג ומצבות עזך לארץ תרד׃

בחוצות יתהוללו הרכב ישתקשקון ברחבות מראיהן כלפידם כברקים ירוצצו׃

קול שוט וקול רעש אופן וסוס דהר ומרכבה מרקדה׃

פרש מעלה ולהב חרב וברק חנית ורב חלל וכבד פגר ואין קצה לגויה יכשלו בגויתם׃

האיש הרך בך והענג מאד תרע עינו באחיו ובאשת חיקו וביתר בניו אשר יותיר׃

מתת לאחד מהם מבשר בניו אשר יאכל מבלי השאיר לו כל במצור ובמצוק אשר יציק לך איבך בכל שעריך׃

גם תנין חלצו שד היניקו גוריהן בת עמי לאכזר כי ענים במדבר׃

דבק לשון יונק אל חכו בצמא עוללים שאלו לחם פרש אין להם׃