ויאמר למחר ויאמר כדברך למען תדע כי אין כיהוה אלהינו׃

כי בפעם הזאת אני שלח את כל מגפתי אל לבך ובעבדיך ובעמך בעבור תדע כי אין כמני בכל הארץ׃

מי כמכה באלם יהוה מי כמכה נאדר בקדש נורא תהלת עשה פלא׃

כי לא כצורנו צורם ואיבינו פלילים׃

אין כאל ישרון רכב שמים בעזרך ובגאותו שחקים׃

על כן גדלת אדני יהוה כי אין כמוך ואין אלהים זולתך בכל אשר שמענו באזנינו׃

כל עצמותי תאמרנה יהוה מי כמוך מציל עני מחזק ממנו ועני ואביון מגזלו׃

אין כמוך באלהים אדני ואין כמעשיך׃

כי גדול אתה ועשה נפלאות אתה אלהים לבדך׃

כי מי בשחק יערך ליהוה ידמה ליהוה בבני אלים׃

יהוה אלהי צבאות מי כמוך חסין יה ואמונתך סביבותיך׃

ואל מי תדמיון אל ומה דמות תערכו לו׃

ואל מי תדמיוני ואשוה יאמר קדוש׃

למי תדמיוני ותשוו ותמשלוני ונדמה׃

זכרו ראשנות מעולם כי אנכי אל ואין עוד אלהים ואפס כמוני׃

עשה חסד לאלפים ומשלם עון אבות אל חיק בניהם אחריהם האל הגדול הגבור יהוה צבאות שמו׃

וארא ואקום ואמר אל החרים ואל הסגנים ואל יתר העם אל תיראו מפניהם את אדני הגדול והנורא זכרו והלחמו על אחיכם בניכם ובנתיכם נשיכם ובתיכם׃

ועתה אלהינו האל הגדול הגבור והנורא שומר הברית והחסד אל ימעט לפניך את כל התלאה אשר מצאתנו למלכינו לשרינו ולכהנינו ולנביאנו ולאבתינו ולכל עמך מימי מלכי אשור עד היום הזה׃

שיר מזמור לבני קרח גדול יהוה ומהלל מאד בעיר אלהינו הר קדשו׃

כי גדול יהוה ומהלל מאד נורא הוא על כל אלהים׃

גדול יהוה ומהלל מאד ולגדלתו אין חקר׃

גדול אדונינו ורב כח לתבונתו אין מספר׃

צהלי ורני יושבת ציון כי גדול בקרבך קדוש ישראל׃

אתוהי כמה רברבין ותמהוהי כמה תקיפין מלכותה מלכות עלם ושלטנה עם דר ודר׃

ולקצת יומיה אנה נבוכדנצר עיני לשמיא נטלת ומנדעי עלי יתוב ולעליא ברכת ולחי עלמא שבחת והדרת די שלטנה שלטן עלם ומלכותה עם דר ודר׃

כי ממזרח שמש ועד מבואו גדול שמי בגוים ובכל מקום מקטר מגש לשמי ומנחה טהורה כי גדול שמי בגוים אמר יהוה צבאות׃