אין קרא בצדק ואין נשפט באמונה בטוח על תהו ודבר שוא הרו עמל והוליד און׃

מצדיקי רשע עקב שחד וצדקת צדיקים יסירו ממנו׃

הוי החקקים חקקי און ומכתבים עמל כתבו׃

להטות מדין דלים ולגזל משפט עניי עמי להיות אלמנות שללם ואת יתומים יבזו׃

עד מתי תשפטו עול ופני רשעים תשאו סלה׃

פלטו דל ואביון מיד רשעים הצילו׃

ועוד ראיתי תחת השמש מקום המשפט שמה הרשע ומקום הצדק שמה הרשע׃

ככלוב מלא עוף כן בתיהם מלאים מרמה על כן גדלו ויעשירו׃

שמנו עשתו גם עברו דברי רע דין לא דנו דין יתום ויצליחו ומשפט אביונים לא שפטו׃

הנביאים נבאו בשקר והכהנים ירדו על ידיהם ועמי אהבו כן ומה תעשו לאחריתה׃

ההפכים ללענה משפט וצדקה לארץ הניחו׃

לכן יען בושסכם על דל ומשאת בר תקחו ממנו בתי גזית בניתם ולא תשבו בם כרמי חמד נטעתם ולא תשתו את יינם׃

שמעו נא זאת ראשי בית יעקב וקציני בית ישראל המתעבים משפט ואת כל הישרה יעקשו׃

ראשיה בשחד ישפטו וכהניה במחיר יורו ונביאיה בכסף יקסמו ועל יהוה ישענו לאמר הלוא יהוה בקרבנו לא תבוא עלינו רעה׃

על הרע כפים להיטיב השר שאל והשפט בשלום והגדול דבר הות נפשו הוא ויעבתוה׃

אל תאמינו ברע אל תבטחו באלוף משכבת חיקך שמר פתחי פיך׃

על כן תפוג תורה ולא יצא לנצח משפט כי רשע מכתיר את הצדיק על כן יצא משפט מעקל׃

הוי מראה ונגאלה העיר היונה׃

שריה בקרבה אריות שאגים שפטיה זאבי ערב לא גרמו לבקר׃