חננני יהוה ראה עניי משנאי מרוממי משערי מות׃

למען אספרה כל תהלתיך בשערי בת ציון אגילה בישועתך׃

כי יצפנני בסכה ביום רעה יסתרני בסתר אהלו בצור ירוממני׃

ועתה ירום ראשי על איבי סביבותי ואזבחה באהלו זבחי תרועה אשירה ואזמרה ליהוה׃

הפכת מספדי למחול לי פתחת שקי ותאזרני שמחה׃

למען יזמרך כבוד ולא ידם יהוה אלהי לעולם אודך׃

אדני שפתי תפתח ופי יגיד תהלתך׃

אבוא ביתך בעולות אשלם לך נדרי׃

עלות מחים אעלה לך עם קטרת אילים אעשה בקר עם עתודים סלה׃

בכל יום אברכך ואהללה שמך לעולם ועד׃

הללוהו בתף ומחול הללוהו במנים ועוגב׃

יהוה אדני חילי וישם רגלי כאילות ועל במותי ידרכני למנצח בנגינותי׃