תרתי בלבי למשוך ביין את בשרי ולבי נהג בחכמה ולאחז בסכלות עד אשר אראה אי זה טוב לבני האדם אשר יעשו תחת השמים מספר ימי חייהם׃

סוף דבר הכל נשמע את האלהים ירא ואת מצותיו שמור כי זה כל האדם׃

רבים אמרים מי יראנו טוב נסה עלינו אור פניך יהוה׃

יהוה מנת חלקי וכוסי אתה תומיך גורלי׃

אני בצדק אחזה פניך אשבעה בהקיץ תמונתך׃

יבחר לנו את נחלתנו את גאון יעקב אשר אהב סלה׃

חלקי יהוה אמרה נפשי על כן אוחיל לו׃

טוב ויחיל ודומם לתשועת יהוה׃

הגיד לך אדם מה טוב ומה יהוה דורש ממך כי אם עשות משפט ואהבת חסד והצנע לכת עם אלהיך׃

וטוב לא יהיה לרשע ולא יאריך ימים כצל אשר איננו ירא מלפני אלהים׃

גם אהבתם גם שנאתם גם קנאתם כבר אבדה וחלק אין להם עוד לעולם בכל אשר נעשה תחת השמש׃

כי גרים אנחנו לפניך ותושבים ככל אבתינו כצל ימינו על הארץ ואין מקוה׃

כי תמול אנחנו ולא נדע כי צל ימינו עלי ארץ׃

כציץ יצא וימל ויברח כצל ולא יעמוד׃

הנה טפחות נתתה ימי וחלדי כאין נגדך אך כל הבל כל אדם נצב סלה׃

אך בצלם יתהלך איש אך הבל יהמיון יצבר ולא ידע מי אספם׃

זכר אני מה חלד על מה שוא בראת כל בני אדם׃

ימי שנותינו בהם שבעים שנה ואם בגבורת שמונים שנה ורהבם עמל ואון כי גז חיש ונעפה׃

למנות ימינו כן הודע ונבא לבב חכמה׃

ימי כצל נטוי ואני כעשב איבש׃

כצל כנטותו נהלכתי ננערתי כארבה׃

אדם להבל דמה ימיו כצל עובר׃

ולא תדעו מה ילד יום מחר כי מה חייכם עשן הם אשר נראה כמעט רגע ואחר כלה וילך׃

וראיתי כי אין טוב מאשר ישמח האדם במעשיו כי הוא חלקו כי מי יביאנו לראות במה שיהיה אחריו׃

כי איננו ידע מה שיהיה כי כאשר יהיה מי יגיד לו׃

יכבדו בניו ולא ידע ויצערו ולא יבין למו׃