מי יודע רוח בני האדם העלה היא למעלה ורוח הבהמה הירדת היא למטה לארץ׃

ואלו חיה אלף שנים פעמים וטובה לא ראה הלא אל מקום אחד הכל הולך׃

כל אשר תמצא ידך לעשות בכחך עשה כי אין מעשה וחשבון ודעת וחכמה בשאול אשר אתה הלך שמה׃

ויגוע וימת אברהם בשיבה טובה זקן ושבע ויאסף אל עמיו׃

ואלה שני חיי ישמעאל מאת שנה ושלשים שנה ושבע שנים ויגוע וימת ויאסף אל עמיו׃

וראיתה אתה ונאספת אל עמיך גם אתה כאשר נאסף אהרן אחיך׃

כלה ענן וילך כן יורד שאול לא יעלה׃

אם אקוה שאול ביתי בחשך רפדתי יצועי׃

אך לא בעי ישלח יד אם בפידו להן שוע׃

כצאן לשאול שתו מות ירעם וירדו בם ישרים לבקר וצירם לבלות שאול מזבל לו׃

בזעת אפיך תאכל לחם עד שובך אל האדמה כי ממנה לקחת כי עפר אתה ואל עפר תשוב׃

זכר נא כי כחמר עשיתני ואל עפר תשיבני׃

הלא כחלב תתיכני וכגבנה תקפיאני׃

יגוע כל בשר יחד ואדם על עפר ישוב׃

תסתיר פניך יבהלון תסף רוחם יגועון ואל עפרם ישובון׃

ורבים מישני אדמת עפר יקיצו אלה לחיי עולם ואלה לחרפות לדראון עולם׃