כי אין זכרון לחכם עם הכסיל לעולם בשכבר הימים הבאים הכל נשכח ואיך ימות החכם עם הכסיל׃

ואדם ביקר בל ילין נמשל כבהמות נדמו׃

אדם ביקר ולא יבין נמשל כבהמות נדמו׃

איש בער לא ידע וכסיל לא יבין את זאת׃

בפרח רשעים כמו עשב ויציצו כל פעלי און להשמדם עדי עד׃

כי מות נמות וכמים הנגרים ארצה אשר לא יאספו ולא ישא אלהים נפש וחשב מחשבות לבלתי ידח ממנו נדח׃

וגבר ימות ויחלש ויגוע אדם ואיו׃

ואיש שכב ולא יקום עד בלתי שמים לא יקיצו ולא יערו משנתם׃

תסתיר פניך יבהלון תסף רוחם יגועון ואל עפרם ישובון׃

וסבותי אני ליאש את לבי על כל העמל שעמלתי תחת השמש׃

כי מה הוה לאדם בכל עמלו וברעיון לבו שהוא עמל תחת השמש׃

הנה טפחות נתתה ימי וחלדי כאין נגדך אך כל הבל כל אדם נצב סלה׃

אך בצלם יתהלך איש אך הבל יהמיון יצבר ולא ידע מי אספם׃

זכר אני מה חלד על מה שוא בראת כל בני אדם׃

מי גבר יחיה ולא יראה מות ימלט נפשו מיד שאול סלה׃