טובה חכמה עם נחלה ויתר לראי השמש׃

כי בצל החכמה בצל הכסף ויתרון דעת החכמה תחיה בעליה׃

ואמרתי אני טובה חכמה מגבורה וחכמת המסכן בזויה ודבריו אינם נשמעים׃

קנה חכמה קנה בינה אל תשכח ואל תט מאמרי פי׃

ראשית חכמה קנה חכמה ובכל קנינך קנה בינה׃

קנה חכמה מה טוב מחרוץ וקנות בינה נבחר מכסף׃

ושבתם וראיתם בין צדיק לרשע בין עבד אלהים לאשר לא עבדו׃

כי הנה היום בא בער כתנור והיו כל זדים וכל עשה רשעה קש ולהט אתם היום הבא אמר יהוה צבאות אשר לא יעזב להם שרש וענף׃

וזרחה לכם יראי שמי שמש צדקה ומרפא בכנפיה ויצאתם ופשתם כעגלי מרבק׃

ומתוק האור וטוב לעינים לראות את השמש׃

נר לרגלי דברך ואור לנתיבתי׃

פתח דבריך יאיר מבין פתיים׃

וארח צדיקים כאור נגה הולך ואור עד נכון היום׃

דרך רשעים כאפלה לא ידעו במה יכשלו׃

ואם עינך רעה כל גופך יחשך והנה אם יחשך האור אשר בקרבך מה רב החשך׃

נר הגוף הוא העין לכן בהיות עינך תמימה גם כל גופך יאור ובהיותה רעה וחשך גם גופך׃

על כן השמר לך פן יחשך האור אשר בקרבך׃

כי מלפנים הייתם חשך ועתה הנכם אור באדנינו התהלכו נא כבני אור׃