תהפכות בלבו חרש רע בכל עת מדנים ישלח׃

לב חרש מחשבות און רגלים ממהרות לרוץ לרעה׃

איש חמס יפתה רעהו והוליכו בדרך לא טוב׃

עצה עיניו לחשב תהפכות קרץ שפתיו כלה רעה׃

כי לא שלום ידברו ועל רגעי ארץ דברי מרמות יחשבון׃

שלח ידיו בשלמיו חלל בריתו׃

כי הנה ארבו לנפשי יגורו עלי עזים לא פשעי ולא חטאתי יהוה׃

ויאמרו לכו ונחשבה על ירמיהו מחשבות כי לא תאבד תורה מכהן ועצה מחכם ודבר מנביא לכו ונכהו בלשון ואל נקשיבה אל כל דבריו׃

הישלם תחת טובה רעה כי כרו שוחה לנפשי זכר עמדי לפניך לדבר עליהם טובה להשיב את חמתך מהם׃

הוי חשבי און ופעלי רע על משכבותם באור הבקר יעשוה כי יש לאל ידם׃

וחמדו שדות וגזלו ובתים ונשאו ועשקו גבר וביתו ואיש ונחלתו׃