15
וילכו הפרושים ויתיעצו איך יכשילהו בדבר׃
16
וישלחו אליו את תלמידיהם עם ההורדוסיים לאמר רבי ידענו כי איש אמת אתה ותורה באמת את דרך אלהים ולא תגור מפני איש כי אינך מכיר פני אדם׃
17
לכן הגידה נא לנו את דעתך הנכון לנו לתת מס אל הקיסר אם לא׃
18
וישוע ידע את רשעתם ויאמר החנפים מה תנסוני׃
19
הראוני את מטבע המס ויביאו לו דינר׃
20
ויאמר אליהם של מי הצורה הזאת והמכתב אשר עליו׃
21
ויאמרו אליו של הקיסר ויאמר אליהם לכן תנו לקיסר את אשר לקיסר ולאלהים את אשר לאלהים׃
22
וכשמעם את זאת תמהו ויעזבהו וילכו להם׃
23
ביום ההוא נגשו אליו צדוקים האמרים כי אין תחית המתים וישאלו אתו לאמר׃
24
רבי הן משה אמר איש כי ימות ובנים אין לו אחיו ייבם את אשתו והקים זרע לאחיו׃
25
ואתנו היו שבעה אחים והראשון נשא אשה וימת וזרע אין לו ויעזב את אשתו לאחיו׃
26
וכמו כן גם השני וכן גם השלישי עד השבעה׃
28
ועתה בתחית המתים למי מן השבעה תהיה לאשה כי לכלם היתה׃
29
ויען ישוע ויאמר להם טעים אתם באשר אינכם יודעים את הכתובים וגם את גבורת האלהים׃
30
כי בתחית המתים לא ישאו נשים ולא תנשאנה כי אם כמלאכי אלהים בשמים יהיו׃
31
ועל דבר תחית המתים הלא קראתם את הנאמר לכם מפי האלהים לאמר׃
32
אנכי אלהי אברהם ואלהי יצחק ואלהי יעקב והוא איננו אלהי המתים כי אם אלהי החיים׃