לך אל נמלה עצל ראה דרכיה וחכם׃

תכין בקיץ לחמה אגרה בקציר מאכלה׃

מעט שנות מעט תנומות מעט חבק ידים לשכב׃

יד חרוצים תמשול ורמיה תהיה למס׃

לא יחרך רמיה צידו והון אדם יקר חרוץ׃

מתאוה ואין נפשו עצל ונפש חרצים תדשן׃

דרך עצל כמשכת חדק וארח ישרים סללה׃

טמן עצל ידו בצלחת גם אל פיהו לא ישיבנה׃

מחרף עצל לא יחרש ישאל בקציר ואין׃

אמר עצל ארי בחוץ בתוך רחבות ארצח׃

על שדה איש עצל עברתי ועל כרם אדם חסר לב׃

ואחזה אנכי אשית לבי ראיתי לקחתי מוסר׃

ובא מתהלך רישך ומחסריך כאיש מגן׃

אמר עצל שחל בדרך ארי בין הרחבות׃

חכם עצל בעיניו משבעה משיבי טעם׃

ויען אדניו ויאמר אליו העבד הרע והעצל אתה ידעת כי קצר אנכי באשר לא זרעתי וכנס מאשר לא פזרתי׃