לא יועילו אוצרות רשע וצדקה תציל ממות׃

נחלה מבחלת בראשנה ואחריתה לא תברך׃

מרבה הונו בנשך ובתרבית לחונן דלים יקבצנו׃

וישכון ערים נכחדות בתים לא ישבו למו אשר התעתדו לגלים׃

לא יעשר ולא יקום חילו ולא יטה לארץ מנלם׃

חיל בלע ויקאנו מבטנו יורשנו אל׃

כי רצץ עזב דלים בית גזל ולא יבנהו׃

אין שריד לאכלו על כן לא יחיל טובו׃

אם יצבר כעפר כסף וכחמר יכין מלבוש׃

יכין וצדיק ילבש וכסף נקי יחלק׃

ואבד העשר ההוא בענין רע והוליד בן ואין בידו מאומה׃

קרא דגר ולא ילד עשה עשר ולא במשפט בחצי ימו יעזבנו ובאחריתו יהיה נבל׃

הלוא אלה כלם עליו משל ישאו ומליצה חידות לו ויאמר הוי המרבה לא לו עד מתי ומכביד עליו עבטיט׃

הלוא פתע יקומו נשכיך ויקצו מזעזעיך והיית למשסות למו׃

הוי העשירים בכו והילילו על הצרות אשר תבאנה עליכם׃

זהבכם וכספכם כסתם חלאה והיתה חלאתם בכם לעדות ואכלה כמו אש את בשרכם אצרתם לכם אוצרות בקץ הימים׃

התעדנתם בארץ והתענגתם והשמנתם את לבכם כמו ליום טבחה׃

טוב ינחיל בני בנים וצפון לצדיק חיל חוטא׃

רב אכל ניר ראשים ויש נספה בלא משפט׃

נחלה מבחלת בראשנה ואחריתה לא תברך׃

ידע תדע פני צאנך שית לבך לעדרים׃

גלה חציר ונראה דשא ונאספו עשבות הרים׃

ודי חלב עזים ללחמך ללחם ביתך וחיים לנערותיך׃

יגיע כפיך כי תאכל אשריך וטוב לך׃