כל הארץ ישתחוו לך ויזמרו לך יזמרו שמך סלה׃

ישמחו וירננו לאמים כי תשפט עמים מישור ולאמים בארץ תנחם סלה׃

ואמרתם ביום ההוא הודו ליהוה קראו בשמו הודיעו בעמים עלילתיו הזכירו כי נשגב שמו׃

צהלי ורני יושבת ציון כי גדול בקרבך קדוש ישראל׃

לרכב בשמי שמי קדם הן יתן בקולו קול עז׃

וירכב על כרוב ויעף וידא על כנפי רוח׃

המקרה במים עליותיו השם עבים רכובו המהלך על כנפי רוח׃

אין כאל ישרון רכב שמים בעזרך ובגאותו שחקים׃

משא מצרים הנה יהוה רכב על עב קל ובא מצרים ונעו אלילי מצרים מפניו ולבב מצרים ימס בקרבו׃

ויאמר אלהים אל משה אהיה אשר אהיה ויאמר כה תאמר לבני ישראל אהיה שלחני אליכם׃

וארא אל אברהם אל יצחק ואל יעקב באל שדי ושמי יהוה לא נודעתי להם׃

והבאתי אתכם אל הארץ אשר נשאתי את ידי לתת אתה לאברהם ליצחק וליעקב ונתתי אתה לכם מורשה אני יהוה׃