אדני נגדך כל תאותי ואנחתי ממך לא נסתרה׃

יגעתי בקראי נחר גרוני כלו עיני מיחל לאלהי׃

ביום צרתי אדני דרשתי ידי לילה נגרה ולא תפוג מאנה הנחם נפשי׃

אחזת שמרות עיני נפעמתי ולא אדבר׃

אזכרה נגינתי בלילה עם לבבי אשיחה ויחפש רוחי׃

האפס לנצח חסדו גמר אמר לדר ודר׃

עיני דאבה מני עני קראתיך יהוה בכל יום שטחתי אליך כפי׃

כי כלו בעשן ימי ועצמותי כמו קד נחרו׃

מקול אנחתי דבקה עצמי לבשרי׃

ותתעטף עלי רוחי בתוכי ישתומם לבי׃

פרשתי ידי אליך נפשי כארץ עיפה לך סלה׃

כן הנחלתי לי ירחי שוא ולילות עמל מנו לי׃

נקטה נפשי בחיי אעזבה עלי שיחי אדברה במר נפשי׃

גם היום מרי שחי ידי כבדה על אנחתי׃

שמעה תפלתי יהוה ושועתי האזינה אל דמעתי אל תחרש כי גר אנכי עמך תושב ככל אבותי׃

היתה לי דמעתי לחם יומם ולילה באמר אלי כל היום איה אלהיך׃

מליצי רעי אל אלוה דלפה עיני׃

ואמרת אליהם את הדבר הזה תרדנה עיני דמעה לילה ויומם ואל תדמינה כי שבר גדול נשברה בתולת בת עמי מכה נחלה מאד׃

בכו תבכה בלילה ודמעתה על לחיה אין לה מנחם מכל אהביה כל רעיה בגדו בה היו לה לאיבים׃

על אלה אני בוכיה עיני עיני ירדה מים כי רחק ממני מנחם משיב נפשי היו בני שוממים כי גבר אויב׃

כלו בדמעות עיני חמרמרו מעי נשפך לארץ כבדי על שבר בת עמי בעטף עולל ויונק ברחבות קריה׃

צעק לבם אל אדני חומת בת ציון הורידי כנחל דמעה יומם ולילה אל תתני פוגת לך אל תדם בת עינך׃

קומי רני בליל לראש אשמרות שפכי כמים לבך נכח פני אדני שאי אליו כפיך על נפש עולליך העטופים ברעב בראש כל חוצות׃

פלגי מים תרד עיני על שבר בת עמי׃

עד ישקיף וירא יהוה משמים׃

ותעמד לרגליו מאחריו ותבך ותחל להרטיב את רגליו בדמעות ותנגב אתן בשערות ראשה ותשק את רגליו ותמשח אתן בשמן׃