קומה יהוה הושיעני אלהי כי הכית את כל איבי לחי שני רשעים שברת׃

שבר זרוע רשע ורע תדרוש רשעו בל תמצא׃

שאגת אריה וקול שחל ושני כפירים נתעו׃

ליש אבד מבלי טרף ובני לביא יתפרדו׃

ואשברה מתלעות עול ומשניו אשליך טרף׃

בן אדם את זרוע פרעה מלך מצרים שברתי והנה לא חבשה לתת רפאות לשום חתול לחבשה לחזקה לתפש בחרב׃

והפצותי את מצרים בגוים וזריתם בארצות׃

והחזקתי את זרעות מלך בבל וזרעות פרעה תפלנה וידעו כי אני יהוה בתתי חרבי ביד מלך בבל ונטה אותה אל ארץ מצרים׃

דמינו כאריה יכסוף לטרוף וככפיר ישב במסתרים׃

על שחל ופתן תדרך תרמס כפיר ותנין׃

הן עם כלביא יקום וכארי יתנשא לא ישכב עד יאכל טרף ודם חללים ישתה׃

כי כה אמר יהוה אלי כאשר יהגה האריה והכפיר על טרפו אשר יקרא עליו מלא רעים מקולם לא יחת ומהמונם לא יענה כן ירד יהוה צבאות לצבא על הר ציון ועל גבעתה׃

כי אנכי כשחל לאפרים וככפיר לבית יהודה אני אני אטרף ואלך אשא ואין מציל׃

והיה שארית יעקב בגוים בקרב עמים רבים כאריה בבהמות יער ככפיר בעדרי צאן אשר אם עבר ורמס וטרף ואין מציל׃