פי יספר צדקתך כל היום תשועתך כי לא ידעתי ספרות׃

גם לשוני כל היום תהגה צדקתך כי בשו כי חפרו מבקשי רעתי׃

ושננתם לבניך ודברת בם בשבתך בביתך ובלכתך בדרך ובשכבך ובקומך׃

וכתבתם על מזוזת ביתך ובשעריך׃

שפתי צדיק ירעו רבים ואוילים בחסר לב ימותו׃

פי צדיק ינוב חכמה ולשון תהפכות תכרת׃

שפתי חכמים יזרו דעת ולב כסילים לא כן׃

תפוחי זהב במשכיות כסף דבר דבר על אפניו׃

כצנת שלג ביום קציר ציר נאמן לשלחיו ונפש אדניו ישיב׃

שמן וקטרת ישמח לב ומתק רעהו מעצת נפש׃

האיש הטוב מאוצר לבו הטוב מוציא את הטוב והאיש הרע מאוצר הרע מוציא רע׃

כל דבר נבול לא יצא מפיכם כי אם הטוב והמועיל לבנות לפי הצרך למען יתן חן לשמעיו׃

דבריכם יהיו נעימים בכל עת וממלחים במלח למען תדעו להשיב דבר לכל אדם׃