ראיתי רשע עריץ ומתערה כאזרח רענן׃

ויעבר והנה איננו ואבקשהו ולא נמצא׃

עד אבוא אל מקדשי אל אבינה לאחריתם׃

איך היו לשמה כרגע ספו תמו מן בלהות׃

זרמתם שנה יהיו בבקר כחציר יחלף׃

בבקר יציץ וחלף לערב ימולל ויבש׃

בפרח רשעים כמו עשב ויציצו כל פעלי און להשמדם עדי עד׃

יבשו ויסגו אחור כל שנאי ציון׃

שלא מלא כפו קוצר וחצנו מעמר׃

כי רננת רשעים מקרוב ושמחת חנף עדי רגע׃

כגללו לנצח יאבד ראיו יאמרו איו׃

עין שזפתו ולא תוסיף ולא עוד תשורנו מקומו׃

והעשיר יתהלל בשפלותו כי יעבר כציץ החציר׃

כי זרח השמש בחמתו וייבש את החציר ויבל ציצו וחסד מראהו אבד כן יבול העשיר בהליכותיו׃

כי כל בשר חציר וכל כבוד איש כציץ השדה יבש חציר נבל ציץ׃