אלה ברכב ואלה בסוסים ואנחנו בשם יהוה אלהינו נזכיר׃

ויהם יהוה את סיסרא ואת כל הרכב ואת כל המחנה לפי חרב לפני ברק וירד סיסרא מעל המרכבה וינס ברגליו׃

ואדני השמיע את מחנה ארם קול רכב קול סוס קול חיל גדול ויאמרו איש אל אחיו הנה שכר עלינו מלך ישראל את מלכי החתים ואת מלכי מצרים לבוא עלינו׃

ויקומו וינוסו בנשף ויעזבו את אהליהם ואת סוסיהם ואת חמריהם המחנה כאשר היא וינסו אל נפשם׃

סוס מוכן ליום מלחמה וליהוה התשועה׃

שבתי וראה תחת השמש כי לא לקלים המרוץ ולא לגבורים המלחמה וגם לא לחכמים לחם וגם לא לנבנים עשר וגם לא לידעים חן כי עת ופגע יקרה את כלם׃

ותאמרו לא כי על סוס ננוס על כן תנוסון ועל קל נרכב על כן יקלו רדפיכם׃

אשור לא יושיענו על סוס לא נרכב ולא נאמר עוד אלהינו למעשה ידינו אשר בך ירחם יתום׃

לא בגבורת הסוס יחפץ לא בשוקי האיש ירצה׃

התתן לסוס גבורה התלביש צוארו רעמה׃

יחפרו בעמק וישיש בכח יצא לקראת נשק׃

עליו תרנה אשפה להב חנית וכידון׃

בדי שפר יאמר האח ומרחוק יריח מלחמה רעם שרים ותרועה׃