למנצח אל הנחילות מזמור לדוד אמרי האזינה יהוה בינה הגיגי׃

יהוה נחני בצדקתך למען שוררי הושר לפני דרכך׃

הורני יהוה דרכך ונחני בארח מישור למען שוררי׃

הורני יהוה דרכך אהלך באמתך יחד לבבי ליראה שמך׃

דרך פקודיך הבינני ואשיחה בנפלאותיך׃

השמיעני בבקר חסדך כי בך בטחתי הודיעני דרך זו אלך כי אליך נשאתי נפשי׃

ועתה אם נא מצאתי חן בעיניך הודעני נא את דרכך ואדעך למען אמצא חן בעיניך וראה כי עמך הגוי הזה׃

בארח צדקה אהלך בתוך נתיבות משפט׃

והלכו עמים רבים ואמרו לכו ונעלה אל הר יהוה אל בית אלהי יעקב וירנו מדרכיו ונלכה בארחתיו כי מציון תצא תורה ודבר יהוה מירושלם׃

כה אמר יהוה עמדו על דרכים וראו ושאלו לנתבות עולם אי זה דרך הטוב ולכו בה ומצאו מרגוע לנפשכם ויאמרו לא נלך׃