כי אראה שמיך מעשי אצבעתיך ירח וכוכבים אשר כוננתה׃

בדבר יהוה שמים נעשו וברוח פיו כל צבאם׃

השמים שמים ליהוה והארץ נתן לבני אדם׃

הללוהו שמש וירח הללוהו כל כוכבי אור׃

הללוהו שמי השמים והמים אשר מעל השמים׃

הישב על חוג הארץ וישביה כחגבים הנוטה כדק שמים וימתחם כאהל לשבת׃

אף בל נטעו אף בל זרעו אף בל שרש בארץ גזעם וגם נשף בהם ויבשו וסערה כקש תשאם׃

שאו מרום עיניכם וראו מי ברא אלה המוציא במספר צבאם לכלם בשם יקרא מרב אונים ואמיץ כח איש לא נעדר׃

כדנה תאמרון להום אלהיא די שמיא וארקא לא עבדו יאבדו מארעא ומן תחות שמיא אלה׃

עשה ארץ בכחו מכין תבל בחכמתו ובתבונתו נטה שמים׃

יען אשר דעת האלהים גלויה בקרבם כי האלהים הודיעם אותה׃

כי מהותו הנעלמה היא כחו הנצחי ואלהותו מעת נברא העולם תודע במעשים ותראה לבלתי היות להם להתנצל׃

הללו יה הללו אל בקדשו הללוהו ברקיע עזו׃

הללוהו בגבורתיו הללוהו כרב גדלו׃

ויאמר אלהים יהי רקיע בתוך המים ויהי מבדיל בין מים למים׃

ויקרא אלהים לרקיע שמים ויהי ערב ויהי בקר יום שני׃

והמשכלים יזהרו כזהר הרקיע ומצדיקי הרבים ככוכבים לעולם ועד׃