בשרתי צדק בקהל רב הנה שפתי לא אכלא יהוה אתה ידעת׃

צדקתך לא כסיתי בתוך לבי אמונתך ותשועתך אמרתי לא כחדתי חסדך ואמתך לקהל רב׃

אמרו לאלהים מה נורא מעשיך ברב עזך יכחשו לך איביך׃

כל הארץ ישתחוו לך ויזמרו לך יזמרו שמך סלה׃

אלהים למדתני מנעורי ועד הנה אגיד נפלאותיך׃

וצדקתך אלהים עד מרום אשר עשית גדלות אלהים מי כמוך׃

ספרו בגוים כבודו בכל העמים נפלאותיו׃

ברכי נפשי את יהוה יהוה אלהי גדלת מאד הוד והדר לבשת׃

עטה אור כשלמה נוטה שמים כיריעה׃

שירו לו זמרו לו שיחו בכל נפלאותיו׃

ואמרתם ביום ההוא הודו ליהוה קראו בשמו הודיעו בעמים עלילתיו הזכירו כי נשגב שמו׃

נבוכדנצר מלכא לכל עממיא אמיא ולשניא די דארין בכל ארעא שלמכון ישגא׃

אתוהי כמה רברבין ותמהוהי כמה תקיפין מלכותה מלכות עלם ושלטנה עם דר ודר׃

ברוך יהוה אלהים אלהי ישראל עשה נפלאות לבדו׃