ואני נסכתי מלכי על ציון הר קדשי׃

שאל ממני ואתנה גוים נחלתך ואחזתך אפסי ארץ׃

כסאך אלהים עולם ועד שבט מישר שבט מלכותך׃

אהבת צדק ותשנא רשע על כן משחך אלהים אלהיך שמן ששון מחבריך׃

לשלמה אלהים משפטיך למלך תן וצדקתך לבן מלך׃

ישאו הרים שלום לעם וגבעות בצדקה׃

ייראוך עם שמש ולפני ירח דור דורים׃

יפרח בימיו צדיק ורב שלום עד בלי ירח׃

לפניו יכרעו ציים ואיביו עפר ילחכו׃

וישתחוו לו כל מלכים כל גוים יעבדוהו׃

יחס על דל ואביון ונפשות אביונים יושיע׃

ויחי ויתן לו מזהב שבא ויתפלל בעדו תמיד כל היום יברכנהו׃

יהי שמו לעולם לפני שמש ינין שמו ויתברכו בו כל גוים יאשרוהו׃

וברוך שם כבודו לעולם וימלא כבודו את כל הארץ אמן ואמן׃

יהוה מלך גאות לבש לבש יהוה עז התאזר אף תכון תבל בל תמוט׃

נכון כסאך מאז מעולם אתה׃

אמרו בגוים יהוה מלך אף תכון תבל בל תמוט ידין עמים במישרים׃

יעלז שדי וכל אשר בו אז ירננו כל עצי יער׃

יהוה מלך תגל הארץ ישמחו איים רבים׃

אש לפניו תלך ותלהט סביב צריו׃

הרים כדונג נמסו מלפני יהוה מלפני אדון כל הארץ׃

יבשו כל עבדי פסל המתהללים באלילים השתחוו לו כל אלהים׃

כי אתה יהוה עליון על כל הארץ מאד נעלית על כל אלהים׃

אור זרע לצדיק ולישרי לב שמחה׃

יהוה מלך ירגזו עמים ישב כרובים תנוט הארץ׃

יודו שמך גדול ונורא קדוש הוא׃

לך יהוה הגדלה והגבורה והתפארת והנצח וההוד כי כל בשמים ובארץ לך יהוה הממלכה והמתנשא לכל לראש׃

והעשר והכבוד מלפניך ואתה מושל בכל ובידך כח וגבורה ובידך לגדל ולחזק לכל׃

כי ילד ילד לנו בן נתן לנו ותהי המשרה על שכמו ויקרא שמו פלא יועץ אל גבור אביעד שר שלום׃

למרבה המשרה ולשלום אין קץ על כסא דוד ועל ממלכתו להכין אתה ולסעדה במשפט ובצדקה מעתה ועד עולם קנאת יהוה צבאות תעשה זאת׃

וחפרה הלבנה ובושה החמה כי מלך יהוה צבאות בהר ציון ובירושלם ונגד זקניו כבוד׃

כי אם שם אדיר יהוה לנו מקום נהרים יארים רחבי ידים בל תלך בו אני שיט וצי אדיר לא יעברנו׃

כי יהוה שפטנו יהוה מחקקנו יהוה מלכנו הוא יושיענו׃

חזה הוית בחזוי ליליא וארו עם ענני שמיא כבר אנש אתה הוה ועד עתיק יומיא מטה וקדמוהי הקרבוהי׃

ולה יהיב שלטן ויקר ומלכו וכל עממיא אמיא ולשניא לה יפלחון שלטנה שלטן עלם די לא יעדה ומלכותה די לא תתחבל׃

גילי מאד בת ציון הריעי בת ירושלם הנה מלכך יבוא לך צדיק ונושע הוא עני ורכב על חמור ועל עיר בן אתנות׃

ואל תביאנו לידי נסיון כי אם חלצנו מן הרע כי לך הממלכה והגבורה והתפארת לעולמי עולמים אמן׃

וההלכים לפניו ואחריו צעקים לאמר הושע נא ברוך הבא בשם יהוה׃

ברוכה מלכות דוד אבינו הבאה בשם יהוה הושע נא במרומים׃

קראים בקול גדול נאה לשה הטבוח לקחת עז ועשר וחכמה וגבורה והדר וכבוד וברכה׃

וכל בריה אשר בשמים ובארץ ומתחת לארץ ואשר על הים וכל אשר בהם את כלם שמעתי אמרים לאמר לישב על הכסא ולשה הברכה וההדר והכבוד והעז לעולמי עולמים׃

והמלאך השביעי תקע בשופר ויהי קלות גדולים בשמים ויאמרו הנה ממלכת העולם היתה לאדיניו ולמשיחו והוא ימלך לעולמי עולמים׃

ויאמרו מודים אנחנו לך יהוה אלהים צבאות ההוה והיה ויבוא כי לבשת עזך הגדול ותמלך׃