כי עשית משפטי ודיני ישבת לכסא שופט צדק׃

תאות ענוים שמעת יהוה תכין לבם תקשיב אזנך׃

לשפט יתום ודך בל יוסיף עוד לערץ אנוש מן הארץ׃

כי לא בזה ולא שקץ ענות עני ולא הסתיר פניו ממנו ובשועו אליו שמע׃

ישפט עניי עם יושיע לבני אביון וידכא עושק׃

כי יציל אביון משוע ועני ואין עזר לו׃

מתוך ומחמס יגאל נפשם וייקר דמם בעיניו׃

פנה אל תפלת הערער ולא בזה את תפלתם׃

ושמעת השמים את תפלתם ואת תחנתם ועשית משפטם׃

ושמעת השמים מכון שבתך את תפלתם ואת תחנתם ועשית משפטם׃

אל תגזל דל כי דל הוא ואל תדכא עני בשער׃

אל תסג גבול עולם ובשדי יתומים אל תבא׃

כי גאלם חזק הוא יריב את ריבם אתך׃

ושפט בצדק דלים והוכיח במישור לענוי ארץ והכה ארץ בשבט פיו וברוח שפתיו ימית רשע׃

דן דין עני ואביון אז טוב הלוא היא הדעת אתי נאם יהוה׃

עורים ראים ופסחים מתהלכים מצרעים מטהרים וחרשים שומעין ומתים קמים ועניים מתבשרי ישועה הם׃