יהוה אלהי ישראל צדיק אתה כי נשארנו פליטה כהיום הזה הננו לפניך באשמתינו כי אין לעמוד לפניך על זאת׃

ואתה צדיק על כל הבא עלינו כי אמת עשית ואנחנו הרשענו׃

צדיק הוא יהוה כי פיהו מריתי שמעו נא כל עמים וראו מכאבי בתולתי ובחורי הלכו בשבי׃

חסדי יהוה כי לא תמנו כי לא כלו רחמיו׃

לך אדני הצדקה ולנו בשת הפנים כיום הזה לאיש יהודה וליושבי ירושלם ולכל ישראל הקרבים והרחקים בכל הארצות אשר הדחתם שם במעלם אשר מעלו בך׃

ברוך יהוה שלא נתננו טרף לשניהם׃

נפשנו כצפור נמלטה מפח יוקשים הפח נשבר ואנחנו נמלטנו׃

טמנו גאים פח לי וחבלים פרשו רשת ליד מעגל מקשים שתו לי סלה׃

יהוה אדני עז ישועתי סכתה לראשי ביום נשק׃

ראש מסבי עמל שפתימו יכסומו׃

איש לשון בל יכון בארץ איש חמס רע יצודנו למדחפת׃