שיר המעלות אל יהוה בצרתה לי קראתי ויענני׃

שיר למעלות אשא עיני אל ההרים מאין יבא עזרי׃

שיר המעלות לדוד שמחתי באמרים לי בית יהוה נלך׃

שיר המעלות אליך נשאתי את עיני הישבי בשמים׃

שיר המעלות לדוד לולי יהוה שהיה לנו יאמר נא ישראל׃

שיר המעלות הבטחים ביהוה כהר ציון לא ימוט לעולם ישב׃

שיר המעלות בשוב יהוה את שיבת ציון היינו כחלמים׃

שיר המעלות לשלמה אם יהוה לא יבנה בית שוא עמלו בוניו בו אם יהוה לא ישמר עיר שוא שקד שומר׃

שיר המעלות אשרי כל ירא יהוה ההלך בדרכיו׃

שיר המעלות רבת צררוני מנעורי יאמר נא ישראל׃

שיר המעלות ממעמקים קראתיך יהוה׃

שיר המעלות לדוד יהוה לא גבה לבי ולא רמו עיני ולא הלכתי בגדלות ובנפלאות ממני׃

שיר המעלות זכור יהוה לדוד את כל ענותו׃

שיר המעלות לדוד הנה מה טוב ומה נעים שבת אחים גם יחד׃

שיר המעלות הנה ברכו את יהוה כל עבדי יהוה העמדים בבית יהוה בלילות׃

אלה אזכרה ואשפכה עלי נפשי כי אעבר בסך אדדם עד בית אלהים בקול רנה ותודה המון חוגג׃

אשר יחדו נמתיק סוד בבית אלהים נהלך ברגש׃

מזמור לדוד בהיותו במדבר יהודה אלהים אלי אתה אשחרך צמאה לך נפשי כמה לך בשרי בארץ ציה ועיף בלי מים׃

כי טוב חסדך מחיים שפתי ישבחונך׃

למנצח על הגתית לבני קרח מזמור מה ידידות משכנותיך יהוה צבאות׃

נכספה וגם כלתה נפשי לחצרות יהוה לבי ובשרי ירננו אל אל חי׃

כי טוב יום בחצריך מאלף בחרתי הסתופף בבית אלהי מדור באהלי רשע׃

נחלתי עדותיך לעולם כי ששון לבי המה׃

והלכו עמים רבים ואמרו לכו ונעלה אל הר יהוה אל בית אלהי יעקב וירנו מדרכיו ונלכה בארחתיו כי מציון תצא תורה ודבר יהוה מירושלם׃

כי יש יום קראו נצרים בהר אפרים קומו ונעלה ציון אל יהוה אלהינו׃

בימים ההמה ובעת ההיא נאם יהוה יבאו בני ישראל המה ובני יהודה יחדו הלוך ובכו ילכו ואת יהוה אלהיהם יבקשו׃

ציון ישאלו דרך הנה פניהם באו ונלוו אל יהוה ברית עולם לא תשכח׃

והלכו גוים רבים ואמרו לכו ונעלה אל הר יהוה ואל בית אלהי יעקב ויורנו מדרכיו ונלכה בארחתיו כי מציון תצא תורה ודבר יהוה מירושלם׃

והלכו ישבי אחת אל אחת לאמר נלכה הלוך לחלות את פני יהוה ולבקש את יהוה צבאות אלכה גם אני׃

כה אמר יהוה צבאות בימים ההמה אשר יחזיקו עשרה אנשים מכל לשנות הגוים והחזיקו בכנף איש יהודי לאמר נלכה עמכם כי שמענו אלהים עמכם׃