11
ונחלמה חלום בלילה אחד אני והוא איש כפתרון חלמו חלמנו׃
12
ושם אתנו נער עברי עבד לשר הטבחים ונספר לו ויפתר לנו את חלמתינו איש כחלמו פתר׃
13
ויהי כאשר פתר לנו כן היה אתי השיב על כני ואתו תלה׃
14
וישלח פרעה ויקרא את יוסף ויריצהו מן הבור ויגלח ויחלף שמלתיו ויבא אל פרעה׃
15
ויאמר פרעה אל יוסף חלום חלמתי ופתר אין אתו ואני שמעתי עליך לאמר תשמע חלום לפתר אתו׃
16
ויען יוסף את פרעה לאמר בלעדי אלהים יענה את שלום פרעה׃