הלא אלוה גבה שמים וראה ראש כוכבים כי רמו׃

הן עד ירח ולא יאהיל וכוכבים לא זכו בעיניו׃

אף כי אנוש רמה ובן אדם תולעה׃

הן אל שגיא ולא נדע מספר שניו ולא חקר׃

אשר יזלו שחקים ירעפו עלי אדם רב׃

הן פרש עליו אורו ושרשי הים כסה׃

על כפים כסה אור ויצו עליה במפגיע׃

אף לזאת יחרד לבי ויתר ממקומו׃

תחת כל השמים ישרהו ואורו על כנפות הארץ׃

ירעם אל בקולו נפלאות עשה גדלות ולא נדע׃

כי האמנם ישב אלהים על הארץ הנה השמים ושמי השמים לא יכלכלוך אף כי הבית הזה אשר בניתי׃

כי אראה שמיך מעשי אצבעתיך ירח וכוכבים אשר כוננתה׃

מה אנוש כי תזכרנו ובן אדם כי תפקדנו׃

הישב על חוג הארץ וישביה כחגבים הנוטה כדק שמים וימתחם כאהל לשבת׃

הנותן רוזנים לאין שפטי ארץ כתהו עשה׃

כי גבהו שמים מארץ כן גבהו דרכי מדרכיכם ומחשבתי ממחשבתיכם׃

אף אם יבין מפרשי עב תשאות סכתו׃

התדע על מפלשי עב מפלאות תמים דעים׃

יהוה ארך אפים וגדול כח ונקה לא ינקה יהוה בסופה ובשערה דרכו וענן אבק רגליו׃