אם חרוצים ימיו מספר חדשיו אתך חקו עשית ולא יעבור׃

מתקו לו רגבי נחל ואחריו כל אדם ימשוך ולפניו אין מספר׃

בזעת אפיך תאכל לחם עד שובך אל האדמה כי ממנה לקחת כי עפר אתה ואל עפר תשוב׃

כי מות נמות וכמים הנגרים ארצה אשר לא יאספו ולא ישא אלהים נפש וחשב מחשבות לבלתי ידח ממנו נדח׃

אין אדם שליט ברוח לכלוא את הרוח ואין שלטון ביום המות ואין משלחת במלחמה ולא ימלט רשע את בעליו׃

כי החיים יודעים שימתו והמתים אינם יודעים מאומה ואין עוד להם שכר כי נשכח זכרם׃

גם מגבה יראו וחתחתים בדרך וינאץ השקד ויסתבל החגב ותפר האביונה כי הלך האדם אל בית עולמו וסבבו בשוק הספדים׃

וישב העפר על הארץ כשהיה והרוח תשוב אל האלהים אשר נתנה׃

וכאשר נגזר על בני אדם פעם אחת המות ואחריו הדין׃