יהוה אהבתי מעון ביתך ומקום משכן כבודך׃

אחת שאלתי מאת יהוה אותה אבקש שבתי בבית יהוה כל ימי חיי לחזות בנעם יהוה ולבקר בהיכלו׃

למנצח על הגתית לבני קרח מזמור מה ידידות משכנותיך יהוה צבאות׃

כי טוב יום בחצריך מאלף בחרתי הסתופף בבית אלהי מדור באהלי רשע׃

שיר המעלות לדוד שמחתי באמרים לי בית יהוה נלך׃

ירושלם הבנויה כעיר שחברה לה יחדו׃

כי שמה ישבו כסאות למשפט כסאות לבית דויד׃

יהי שלום בחילך שלוה בארמנותיך׃

למען בית יהוה אלהינו אבקשה טוב לך׃

ויאמר המלך דויד לארנן לא כי קנה אקנה בכסף מלא כי לא אשא אשר לך ליהוה והעלות עולה חנם׃

כבד את יהוה מהונך ומראשית כל תבואתך׃

וימלאו אסמיך שבע ותירוש יקביך יפרצו׃

ועצי ארזים לאין מספר כי הביאו הצידנים והצרים עצי ארזים לרב לדויד׃

ויאמר דויד שלמה בני נער ורך והבית לבנות ליהוה להגדיל למעלה לשם ולתפארת לכל הארצות אכינה נא לו ויכן דויד לרב לפני מותו׃

והנה בעניי הכינותי לבית יהוה זהב ככרים מאה אלף וכסף אלף אלפים ככרים ולנחשת ולברזל אין משקל כי לרב היה ועצים ואבנים הכינותי ועליהם תוסיף׃

לזהב לכסף ולנחשת ולברזל אין מספר קום ועשה ויהי יהוה עמך׃