עמיאל הששי יששכר השביעי פעלתי השמיני כי ברכו אלהים׃

ויאמר אליו לבן אם נא מצאתי חן בעיניך נחשתי ויברכני יהוה בגללך׃

ויהי מאז הפקיד אתו בביתו ועל כל אשר יש לו ויברך יהוה את בית המצרי בגלל יוסף ויהי ברכת יהוה בכל אשר יש לו בבית ובשדה׃

כבד את יהוה מהונך ומראשית כל תבואתך׃

וימלאו אסמיך שבע ותירוש יקביך יפרצו׃

ברכת יהוה היא תעשיר ולא יוסף עצב עמה׃

הביאו את כל המעשר אל בית האוצר ויהי טרף בביתי ובחנוני נא בזאת אמר יהוה צבאות אם לא אפתח לכם את ארבות השמים והריקתי לכם ברכה עד בלי די׃

וגערתי לכם באכל ולא ישחת לכם את פרי האדמה ולא תשכל לכם הגפן בשדה אמר יהוה צבאות׃