ופן תשא עיניך השמימה וראית את השמש ואת הירח ואת הכוכבים כל צבא השמים ונדחת והשתחוית להם ועבדתם אשר חלק יהוה אלהיך אתם לכל העמים תחת כל השמים׃

אז ידבר יהושע ליהוה ביום תת יהוה את האמרי לפני בני ישראל ויאמר לעיני ישראל שמש בגבעון דום וירח בעמק אילון׃

ולא היה כיום ההוא לפניו ואחריו לשמע יהוה בקול איש כי יהוה נלחם לישראל׃

אם אראה אור כי יהל וירח יקר הלך׃

ברן יחד כוכבי בקר ויריעו כל בני אלהים׃

כי אראה שמיך מעשי אצבעתיך ירח וכוכבים אשר כוננתה׃

מקצה השמים מוצאו ותקופתו על קצותם ואין נסתר מחמתו׃

לך יום אף לך לילה אתה הכינות מאור ושמש׃

לעשה אורים גדלים כי לעולם חסדו׃

את השמש לממשלת ביום כי לעולם חסדו׃

את הירח וכוכבים לממשלות בלילה כי לעולם חסדו׃

הללוהו שמש וירח הללוהו כל כוכבי אור׃

יהללו את שם יהוה כי הוא צוה ונבראו׃

כי כוכבי השמים וכסיליהם לא יהלו אורם חשך השמש בצאתו וירח לא יגיה אורו׃

וחפרה הלבנה ובושה החמה כי מלך יהוה צבאות בהר ציון ובירושלם ונגד זקניו כבוד׃

יוצר אור ובורא חשך עשה שלום ובורא רע אני יהוה עשה כל אלה׃

שמש ירח עמד זבלה לאור חציך יהלכו לנגה ברק חניתך׃

ומיד אחרי צרת הימים ההם תחשך השמש והירח לא יגיה אורו והכוכבים יפלו מן השמים וכחות השמים יתמוטטו׃

ומשעה הששית היה חשך על כל הארץ עד השעה התשיעית׃

אחר הוא כבוד השמש ואחר הוא כבוד הירח ואחר הוא כבוד הכוכבים כי כוכב מכוכב נבדל בכבודו׃

וישפך המלאך הרביעי את קערתו על השמש וינתן לו לצרב את בני אדם באש׃

ויצרבו בני אדם בחם גדול ויגדפו את שם אלהים אשר לו הממשלה על המכות האלה ולא שבו לתת לו הכבוד׃

והעיר איננה צריכה לאור השמש ולנגה הירח כי כבוד אלהים האיר לה ונרה הוא השה׃